Kafe-restoran haqida latifalar

4 ta boyvachcha do‘stlar har kuni bitta restoranda bitta stolda ovqatlanar ekan. Har safar bitta ofitsiant xizmat qilarkan.
Ular har safar vilka, pichoqni berkitib qahvani to‘kib yuborib, ofitsiantning ustidan kulisharkan.
Bir kuni ofitsiantni chaqirib:
— Bizni kechir, senga ko‘p behurmatlik qildik. Sen bu qiliqlarimizga parvo ham qilmay xizmat qilding, -deyishibdi.
Ofitsiant:
— Bo‘pti, endi men ham qahvaga tupurmayman, idishlarni unitazda chayqamayman, - debdi.
Talaba kafega kirsa, dekan tushlik yeb o‘tirgan ekan. Talaba dekanni yoniga borib:
— Domlajon, maylimi siz bilan bir stolda o‘tirib, ovqatlansam? - desa, dekanni jahli chiqib:
— Qayerda ko‘rgansan burgut bilan kalamushni birga ovqat yeb turganini, - debdi.
Shunda talaba bir kulib qo‘yibdi-da:
— Unda siz ovqatingizni yeyavering, men uchib ketaqolay, - dermish.
Bir odam barda qo‘lidagi qadahni aylantirib ichsammi ichmasammi, - deb o‘ylanib o‘tiraveribdi. Buni kuzatib o‘tirgan bir krutoy yigit kelib:
— Sen o‘zi ichasanmi ichmaysanmi? - deb, qadahni bir ko‘tarishda ichib qo‘yibdi-da, haligi odamni masxara qilib tirjayibdi.
O‘ylanib o‘tirgan boyagi kishi unga qaragancha, o‘zicha pichirlabdi: "Ishdan haydaldim, mashinam pachoq bo‘ldi, bankdan yuz million kreditim bor, xotinim tashlab ketdi, endi esa zaharimni ham mana bu ahmoq ichib qo‘ydi", - dermish
Sher bilan buqa restoranda ichib o‘tirgan ekan, buqani xotini telefon qilib qolibdi.
— Nimalar deyaverasan!? Ishing nima qayerda yurganim bilan!? - deb baqirib, telefonni o‘chiribdi buqa.
Shu payt sherni telefoni jiringlabdi:
— Hozir, hozir yetib boraman, - deb javob qaytaribdi sher.
Buqa kulib:
— Hayvonlar podshohi - sher bo‘lsang! Xotiningdan ham shunchalik qo‘rqasanmi?! - desa, sher javob beribdi:
— Ey buqa, seni uyda mol kutyapti. Meni esa sher kutyapti!
Er-xotin restoranga kirishibdi. Xotini restoranning bir burchagidagi stolda aroq ichib o‘tirgan yigitni ko‘rsatib eriga debdi:
— Qarang, shu yigitni men 5 yil avval tashlab ketgan edi. Hanuzgacha ichib yuribdi.
Eri ishongisi kelmay:
— Qo‘ysang-chi, hech kim bunchalik uzoq nishonlamaydi-ku...!? - degan ekan.
Bitta bola mast holatda, tungi klubga kirib barmenga:
— Ukam menga 1 metr aroq ber, - debdi.
Barmen hayron bo‘lib:
— Okam bizda aroqlar metrlab emas, litrlab sotiladi, - desa
— Menga 1 metr berasan, - deb turib olibdi.
Barmenni kallasi ishlab stolning ustiga bir metr uzunlikda aroq to‘kib:
— Mana oka, o‘lchab oling, - debdi
Mast bola, o‘lchab bo‘lib:
— Endi gazetaga o‘rab ber, - dermish...
Kunlarning birida xo‘roz tovuqni restoranga taklif qilibdi.
Restoranda ofitsiant:
— Nima buyurasizlar? - desa, xo‘roz:
— Menga bitta grill, tovuqga esa to‘rtta qaynatilgan tuxum olib keling, - dermish.
“Bonusli somsa” deb yozilgan somsaxonaga kirgan xo‘randa, sotuvchidan so‘radi:
— Qanday qilib “bonusli somsa” yesam bo‘ladi?
Sotuvchi:
— Go‘shtli somsa deganidan istaganingizcha sotib olib, yeb ko‘rasiz. Agar birorta somsani ichidan go‘sht chiqib qolsa, bonusga yana bitta shunaqa somsa beramiz, - dermish.
Restoranda:
— Kim qizil lentaga o‘ralgan 100$ liklarni yo‘qotib qo‘yganidi?
— Men, men, men yo‘qotganidim!
— A mana, faqat lentani o‘zini topdim.
Bir kuni afandi kabobxonani yonidan o‘ta turib, kabobdan chiqayotgan tutun hidini hidlabdi. Ziqna kabobpaz “Seni bir boplay!” deb afandini to‘xtatib, unga do‘q uribdi:
— Kabobdan chiqayotgan tutunni hidlaganing uchun pul to‘la! – desa, uddaburon afandi cho‘ntagidan tangalarini chiqaribdi-da, “jaranglatib-jaranglatib” yana cho‘ntagiga solib yo‘lida ketavergan ekan.