Солиқ ҳақида латифалар

Солиқ идорасида:
— Нима учун йиллик даромадингизни беркитдингиз?
— Бўлмаган гап! Нима қилай, “даромад” катакчасига барча рақамлар сиғмас экан.
Ҳар бир хонадондан солиқларни йиғиб юрган инспектор навбатдаги эшик қўнғироғини босибди.
Ичкаридан бўйнига 1см диаметрлик олтин "трос" тақиб чиққан етти-саккиз ёшли бола чиқиб:
— Сизга ким керак, - дебди оғзидаги сигаретни чуқур тортиб.
— Уйда катталар борми?
— Ўзингиз нима деб ўйлайсиз, - дермиш сигаретни яна бир мартта тортиб.
Солиқ инспектори янги бойлардан биридан сўрабди:
— Маошингиз ҳаминқадар бўлса, бундай ҳашаматли вилла қуриш учун пулни қаердан олгансиз?
Бой:
— Кунларнинг бирида балиқ овига бордим ва тилла балиқча тутиб олдим. Ундан ана шундай дабдабали уй қуриб беришни тилаган эдим.
Солиқ инспектори:
— Шуям гап бўлдими? Мени ишонади, деб ўйлаяпсизми?
Бой:
— Ишонмайсизми? Кетдик, вилламни кўрсатаман!
Йирик банкда иш қизғин кетмоқда. Бир пайт ниқобли одамлар, қуроллари билан банк эшигидан бақириб кириб келишибди:
— Ётинглар, қимирламанглар, ҳеч нарсага қўл теккизманг!!! Бу босқинчилик!
Шунда банк раиси бошини кўтариб мамнун овозда:
— Худога шукур-ей, мен солиқ қўмитасидагилар деб ўйлабман-а! – дермиш.
Жарима – бу тўғри йўл тутмаганинг учун тўловингдир.
Солиқлар эса тўғри йўл тутаётганинг учун тўловинг бўлади...
Бир куни подшоҳ вазирларни йиғиб дебди:
— Салтанатимда солиқлар кун сайин ошиб борса ҳам, хазинада пуллар кўпаймаяпти!? Бунинг боиси недир?
Йиғилганлар орасида доно бир вазир катта муз бўлагини олибди-да, “Шоҳимга узатиб юборинглар!” дебди.
Ҳалиги муз бўлаги қўлма-қўл бўлиб подшоҳга етиб келгунча кичкина томчига айланиб қолибди.
Шунда подшоҳ вазирнинг ақлига таҳсинлар айтиб, барча қўл остида ишлаётган амалдорларни ва хазинага келадиган пулларни қаттиқ назоратга олган экан.
Шарбат сиқиб чиқариш бўйича мусобақа уюштирилибди.
Иштирокчилар бир қўли билан апельсиндан ким кўпроқ шарбат олишга беллаша бошлабдилар.
Биринчи иштирокчи 100 гр. шарбат, иккинчи иштирокчи 200 гр. шарбат, учинчиси эса 500 гр. шарбат сиқиб олибди.
Ғолиб бўлган иштирокчига савол беришибди. “Касбингиз нима?” дейишса, у “Солиқ идораси ходимиман” деб жавоб берибди.
Бир киши солиқ қўмитасига келиб дебди:
— Менга қачон меҳнат таътили берасизлар?
Қўмитадагилар ҳайрон бўлиб:
— Ахир сиз бизни ходимимиз эмассиз-ку!? – дейишса, ҳалиги киши:
— Ҳа, лекин мен фақат сизлар учун ишлаб юрибман-да! – деган экан.
— Дўстим, сигирлар ўтлайдиган ўтлоқни биласанми?
— Ҳа, ям-яшил, кенг дала!
— Қўйлар яшайдиган қўрани-чи, биласанми?
— Ҳа, атрофи тахта билан ўралган...
— Италияни харитадаги кўриниши қандайлигини биласанми?
— Йўқ. Нимага мендан буларни сўраяпсан?
— Шунчаки, географиядан кўра, сигир, қўйларни яхшироқ тушунишингни исботлаб бермоқчи эдим.
Бойиб кетиш ниятида тадбиркор бўлишни режа қилдим. Бизнес режа ҳам ишлаб чиқдим. Кейин билсам, солиқ кодексида мен учун режалар аллақачон ёзиб қўйилган экан.