Дода латифалар

Ғуломжоннинг иккита балиғи бўлган экан.
Бир куни балиқлари сойга чўмилгани бориб, оқиб кетибди.

Икки дугона кеча бўлиб ўтган маишат ҳақида суҳбатлашмоқда:
— Кеча нариги бўлимда ишлайдиган бир сурбет йигит бутун оқшом ортимдан юрди-я...!
Дугонаси:
— Ҳақиқатан ҳам сурбет экан. Менга умуман қиё ҳам боқмади-я...!

— Кеча окулистга боргандим.
— Хўш, нима деди?
— Алифбони ўрганишим керак экан.

Болакай дадасидан сўради:
— Дада менга пул беринг!
— Пулни нима қиласан?
— Янги ойи оламан.
— Ойинг бор-ку...?!
— Ўзимни ойим пул бермадилар. "Даданг уйга эрта келадиган бўлиб қолади. Эрта келса иккинчи даданг кетишга улгирмайди" дедилар.

Бирор инсонга 100 минг совға қилсанг, сендан миннатдор бўлади.
Лекин унга лотореяда 1 миллион ютиб олганингни айтган заҳотинг, қовоғи осилиб қолади...!

Прапоршик кечки йўқлама ўтказмоқда.
— Иванов?!
— Мен!
— Петров?!
— Мен!
— Сидоров?!
— Мен!
— Уч минг ўттиз?!
— ...
— Уч минг ўттиз?!
— Э, неча маротаба айтиш керак, Зозо менинг фамилиям, Зозо!

Судья:
— Сиз бутунлай бошқа одамга айланишингиз керак! Уриниб кўринг!
— Йўқ ўртоқ судья, мумкин эмас.
— Нега ахир?
— Яқинда ҳужжатларимни қалбакилаштирганим учун ўтириб чиқдим...

Эълонлар бўлимига келган қиз:
— Мендан фотомодел чиқадими? -деб сўрабди.
— Йўқ, сиздан фақат фоторобот чиқиши мумкин.

— Менга қара, оғайни, мендан юз минг сўм қарзинг борлиги эсингдами?
— Эсимда. Мана, қара ён дафтаримга катта-катта ҳарфлар билан ёзиб қўйибман.
— Кўрдим.
— Агар шунақа эслатавериб жиғимга тегаверсанг, умуман ўчириб ташлайман.

Истироҳат боғидаги курсида икки нафар истеъфодаги генерал суҳбатлашиб ўтиришибди:
— Эсингдами, Коля, биринчи жаҳон уруши йилларида окопларда аёллар ҳақида ўйламаслигимиз учун бизга таблеткалар беришган эди?
— Эсимда, албатта, пушти таблеткалар беришган. Тинчликми, нега эслаб қолдинг?
— Шунчаки ўзим... Назаримда ўша таблеткалар энди таъсир қиляпти шекилли...