Дода латифалар

Ёши катта одам ёшларга қараб:
— Ҳозир ҳаммаси яхши! Ҳамма шароитлар сизлар учун албатта! Ҳамма жойларга бориб кўриб келишингиз мумкин, албатта агар биздан ортса, - дермиш...

Бир бола соқов экан. Ота-онаси кўрсатмаган табиб-у, доктори қолмабди. Ҳечам гапирмабди. Охири ота-онаси гапиришидан умидини узишибди. Бир куни овқатланиб ўтиришса, соқов бола:
— Шўр экан, - дебди.
Шунда онаси:
— Вой ўғлим, гапирдингми?! Яна бир қайтар...
— Шўр экан овқатингиз!
Ота-она ўзида йўқ хурсанд...
— Сен бола гапираркансан, нега бизни шунча йил қийнадинг? Нимага шу пайтгача индамадинг, - дейишса, бола:
— Шу пайтгача овқатингизни тузи яхши эди-да, - дермиш.

Соқов киши бозорда газли сув сотар экан. Бир одам газ сув ичиб бўлиб:
— Неча пул? - деб сўраса, соқов сотувчи имо-ишора қилибди.
— Сув неча пул? - деб яна сўрабди.
Сотувчи яна имо-ишора қилган экан ҳалиги одам тўлмасдан кетаётса, сув сотувчи бақириб:
— Ака сувни пулини бериб кетмайсизми?! - дер эмиш.

— Нега Россия ўзини "Евроосиё" дейди? Ахир бу мамлакатни асосий қисми Осиёда жойлашган-ку!?
— Демак улар "Евроосиё" эмас, балки "Осиопа"дир!"

Аёл эрига қараб:
— Бундан кейин ароқ ичмасликка сўз берасизми? – дебди.
Эри бўлса хотинини ёнида ширакайф туриб, ҳаёл суряпти:
“15 йилдан бери шу хотиним билан яшайман. Ҳалиям мендан умиди катта...”

Арзимаган кичик сабабларга ҳам қувониб юриш керак!
Фақат кичкина уй ва маош учун эмас...!

— Сизларга мазза, мижозлардан чой-чақа пулини олиб турасизлар...
— Сизларда-чи?
— Бизларда бунинг учун қамашлари мумкин.
— Қаерда ишлайсиз?
— ГАИда...

Эри хотинига қутича берибди. Қути устида эса қуйидаги сўзлар ёзилган экан:
"Мен сенга кераклигимнинг 50 та сабаби шу ерда!"
Қути ичидан электр гўшт майдалагичнинг 50 та қисмлари чиқибди. Хотини икки соат ҳаракат қилса ҳам, уни йиға олмабди.
Шунда қути устидаги сўзларнинг асл маъносини тушуниб етибди.

Она ўғлини кундалигини текшира туриб, мантиқ фанидан "2" баҳо олганини кўриб дебди:
— Яна "2" олибсан. Бу сафар кимни айбламоқчисан?
Бола:
— Билмадим ойижон, мантиқ борасида наслимизни айбласаммикин ёки сизними?

Бир йигит шифокор олдига келибди. Шифокор:
— Хўш, шикоятингиз?
— Ҳеч нима...
— Бирор жойингиз оғрияптими?
— Йўқ!
— Унда нима мақсадда келдингиз?
— Шунчаки ўзим...
— Тушунишимча соғлиғингиз тўғрисида билмоқчисиз?
— Йўғэ-э-э! Эрталаб телевизорни қўйсам, профилактика деб ёзилган экан, шунга айланиб келгандим...