Doda latifalar

To‘yda onalar raqs tushayotganda o‘rtakash terminal ko‘tarib turganmish.
Bu holatni tushunmaganlar so‘rashibdi:
— Nimaga terminal ko‘tarib turibsiz?
Shunda o‘rtakash:
— Kimda agar qistirishga naqd puli bo‘lmasa, plastikda ham qabul qilaveramiz, - dermish.

Mehmonxonada dam olayotgan kishi navbatchiga qo‘ng‘iroq qilibdi:
— Men xotinim bilan xonada urishib qoldik. U o‘zini derazadan pastga tashlamoqchi...
Navbatchi:
— Bu mutlaqo shaxsiy masala! Bizga umuman aloqasi yo‘q!
— Ming la’nat, aloqasi yo‘q emish. Nimaga xonani derazalari ochilmayapti axir!?

Sud majlisida sudya janoblari ayblanuvchiga savol beribdi:
— Xo‘sh ayblanuvchi, soxta pullar ishlab chiqarganingizni tan olasizmi?
— Yo‘q, men hech qanday soxta pul ishlab chiqarmaganman!
Sudya:
— Lekin sizni uyingizdan pul yasaydigan apparat topildi-ku!
Ayblanuvchi:
— Janob sudya, siz odamni urib, o‘ldirganingizni tan olasizmi?
Sudya xayron bo‘lib:
— Qanaqasiga? Men hech kimni…
— Ana, stolingizda bolg‘a turibdi-ku!

— Sizni qo‘lingizdan hamma ish keladimi?
— Bo‘lmasam-chi!?
— Yaxshi, unday bo‘lsa, tish pastasini hammasini chiqarib tashlang! Hammasi chiqdimi?
— Endi esa hammasini qaytarib ichiga solib qo‘ying-chi?!

Konsert paytida ayol erini turtib debdi:
— Shoqosim aka qarang, anavi kishi konsert paytida uxlab o‘tiribdi-ya...
Eri:
— Shuni deb meni uyg‘otdingmi?!

Bir qiz sevgan yigitiga debdi:
— Jonim, qachon menga mashina olib berasiz?
Yigit hayron bo‘lib:
— Bilishimcha, supurgida uchar edinglar. Mashinaga nima bor?! – dermish.

Doim kompyuter qarshisida o‘tiradigan bolaning gapidan:
“Uyda chiroq o‘chib qoldi. Oilamdagilar bilan gaplashishga vaqtim bo‘ldi. Ukam o‘qishga kiribdi. Singlim turmushga chiqib ketibdi. Ota-onam qarib qolishibdi. Negadir buvim ko‘rinmayaptilar?!”

Bir kuni ikkita qurt gaplashib tursa, bitta qurt hadeb qimirlayverarmish.
Shunda sherigi:
— Namuncha qurtga o‘xshab qimirlayverasan? – degan ekan.

Er-xotin televizor ko‘rib o‘tirsa, xotini:
— Voy, oyijon! – deb yuboribdi.
Eri bo‘lsa:
— Rostan, o‘xshar ekan! – dermish.

Doktor yoniga kelgan yigit debdi:
— Necha oydan beri muolaja qilasiz. Haligacha betobman.
Doktor:
— Siz mutlaqo sog‘lomsiz. Faqat miyangizga “Men sog‘lomman, men sog‘lomman” degan fikrni singdirishingiz kerak! Shunda hammasi joyida bo‘ladi, – debdi.
Yigit doktor xonasidan chiqib ketayotgan ekan, doktor:
— Muolaja pullarini to‘lamadingiz-ku axir!? – desa, yigit:
— “Men pul oldim, muolaja pulini oldim!” degan fikrni miyangizga singdiring. Shunda hammasi joyida bo‘ladi, - degan ekan.