Doda latifalar

Bir odam taksi to‘xtatib, orqa o‘rindiqqa o‘rnashib o‘tiribdi. Manzilga yaqinlashganda, orqadan taksichini yelkasiga qo‘lini qo‘ygan ekan, taksichi dod solib baqirib, mashinani daraxtga borib uribdi.
O‘ziga kela olmagan haydovchi boshi yorilgan yo‘lovchiga qarab:
— Kechirasiz og‘ayni. Taksida uchinchi kun ishlayapman. Oldin 15 yil morgda o‘lik tashiganman..., - dermish.

Erkak do‘stiga dedi:
— Kecha kechqurun kelayotsam, yo‘l chetida qurbaqa yotibdi. Rahmim kelib uyga olib keldim. Uxlashga yotayotib uni yonimga yotqizdim. Ertalab uyg‘onsam qurbaqa malikaga aylanib qolibdi. Ishonasanmi do‘stim?
— Ha ishonaman.
— Negadir xotinim ishonmayapti.
— Menda-yam shunaqa bo‘lgandi-da...

Bir kuni xotini eriga:
— Dadajonisi, meni hozir ham avvalgidek yaxshi ko‘rasizmi?
— Yo‘q, unchalik emas.
— Voy, nima uchun?
— Keyingi paytda ko‘zim yaxshi ko‘rmayapti.

— Ishga borgim hech kelmayapti-da...
— “Forbs” jurnalida ism-sharifing bormi?
— Yo‘q ...
— Hoziroq turgin-da, ishingga jo‘na!

Xotin eriga:
— Azizim, uzun sochlarimni kestirib, kalta turmak qilmoqchiman.
— Nega? O‘zi yaxshi-ku!
— Axir boshimga o‘zgartirish kiritish kerak-ku!
— Boshingni o‘zgartirmoqchi ekansan, kitob o‘qishni boshla!

DAN xodimi avtomobilni to‘xtatib, haydovchiga:
— Yukxonani oching! Tekshirib qo‘yay, - debdi.
Haydovchi:
— Komandir, keling yukxonani ochmaylik. Yuz ming beraman, - desa, — Nimalar deyapsiz?! Oching tekshirishim kerak!, - debdi DAN xodimi.
Haydovchi yana ikki yuz ming berishini aytibdi.
— Maynavozchilik qilmay, oching!
— Uch yuz beraman!
— Yo‘q!
— Meni oxirgi gapim, bir million beraman!
— Meniyam oxirgi so‘zim, yukxonani ochasiz!
— Mana marhamat!
DAN xodimi qarasa, yukxona bo‘m-bo‘sh emish.
— Nimaga boshimni qotirib, shuncha pul taklif qildiz?, - desa,
— Siz bilan bir "Pole Chudes" o‘ynagim keldi-da, - dermish haydovchi.

Bir yigit do‘stiga debdi:
— Yuzingga nima qildi? Hamma yog‘ing tirnalgan!
— Qizlarni deb urushdim.
— Kim bilan?
— Kim bilan bo‘lardi, xotinim bilan-da!

O‘n yoshli bola otasidan so‘rabdi:
— Ada, nega bu kolbasani nomi "Doktorskiy"? Nima, uni faqat doktorlar yeydimi?
Otasi:
— Yo‘q o‘g‘lim! Bu kolbasani yeb bo‘lgach, to‘g‘ri doktorga boraverish kerakligini bildiradi...

Sudya:
— Guvoh! Aytingchi, 2015 yil 11 noyabr kuni soat 12 dan 43 daqiqa o‘tganda qayerda edingiz?
Guvoh:
— Albatta uyimda, bir qo‘limda soat va ikkinchi qo‘limda taqvimni ushlab o‘tirgandim.

— Qizim, senga juda ko‘p joydan sovchilar kelishdi. Endi turmushga chiqmasang bo‘lmaydi, - debdi otasi.
Qizi adasiga:
— Turmushga chiqgim kelmaydi. Chunki onamni sog‘inaman, - desa
— Onangni ham o‘zing bilan olib ketishing mumkin, - degan ekan otasi.