Doda latifalar

Bir ayol taksi to‘xtatib boradigan manzilini aytibdi. Haydovchi:
— Nechi pul berasiz? - debdi.
Narxini aytibdi ayol.
— Ha, yo‘q! Benzin oshdi, kam bu puliz, - deb ketib qolibdi.
Yana taksi to‘xtabdi. U ham rozi bo‘lmabdi.
5-6ta taksidan keyin oxiri bittasi "O‘tiring" debdi.
Ayol taksichiga:
— Hamma taksichilar benzin oshdi deb olishmadi. Siz insofli ekansiz, - desa, haydovchi:
— Ha, yo‘q. Men kechagi benzinda yuribman, - dermish.

Bir oligarx kasodga uchrab, bu haqda rafiqasiga ma’lum qilibdi.
— Bilasanmi, biz "Mersedes"ni sotib, "Lada" sotib olishimizga, Rublyovkadagi dang‘illama uyimizni sotib, Moskvadagi kvartiramizga ko‘chib o‘tishimizga to‘g‘ri keladi. Biroq sen meni shunda ham sevaverasan-ku, to‘g‘rimi?.
Rafiqasi esa unga:
— Ha sevaveraman va juda sog‘inaman, - deb javob qaytaribdi

Tungi barlardan biriga it yetaklagan kishi kirib hammaga debdi:
— Meni itim gapira oladi!
Hech kim ishonmabdi va shu yerni o‘zida bahs boshlanib, garovga pul tikilibdi.
Haligi kishini iti hech narsa gapirmabdi. Katta pulni boy bergan xo‘jayini ko‘chaga chiqib, itga baqira boshlabdi:
— Nega bila turib gapirmading? Axir shuncha pul yutqazib qo‘ydim-ku!!!
Shu vaqt it tilga kirib:
— E, xo‘jayin! Lekin ertaga biz qancha pul yutib olishimizni bilsangiz edi...!

O‘zbek, qozoq, rus va gruzin to‘rt askar yigitlar poyezdda xizmatdan qaytayotgan ekanlar.
Gruzin yigit:
— Men vatanim uchun pul to‘la hamyonimni ayamayman, - deb, oynadan hamyonini tashlab yuboribdi.
Poyezd Rossiyaga kelgach, rus yigit boshini derazadan chiqarib:
— Vatanim uchun men eng qimmat suvenirimni ayamayman, - deb harbiy xizmatdan olib kelayotgan esdalik sovg‘asini tashlab yuboribdi.
Poyezd Toshkentga kirib kelgach, o‘zbek yigit:
— O‘zbekistonim uchun hamyon, suvenir nima degan gap!? Hattoki, yaqin qardosh do‘stimni ham ayamayman, - deb qozoqni oynadan tashlab yuborgan ekan.

Ixcham, ozg‘in qizlarni yoqtiradigan yigitlar diqqatiga:
Ilonlarning semizi bo‘lmaydi!

Bir kuni jurnalist futbolchidan so‘rabdi:
— Nega siz boshqa ish qilmaysiz yoki iste’foga chiqmaysiz? Yaxshi o‘ynay olmayapsiz-ku.
Futbolchi:
— Iye, unda oilamni kim boqadi?! Maydonda sal-pal yugurib, katta maosh olyapman..., - dermish.

Do‘konda.
Xaridor:
— Sizda suyaksiz baliq bormi?
Sotuvchi:
— Yo‘q, lekin go‘shtsiz kolbasalar bor.

Mijozlarni qo‘lllab quvvatlash markaziga qo‘ng‘iroq
— Allo, eshitaman?
— Kimdir bormi?
— Men o‘sha kimdirman...! Eshitaman sizni!?

Ikkita uchastka noziri aylanib yurishsa, daraxtda bir odam osilib turgan ekan. Nozirlardan biri ikkinchisiga:
— Nima qilamiz boshimizga ortiqcha tashvish keltirib. Shu murdani narigi tumanga olib borib osib kelaylik, - debdi.
Ikkala nozir murdadan qutulib, yo‘llarida ketaveribdi.
Narigi tumanni nozirlari aylanib yurib, ko‘zi daraxtda osilib turgan odamga tushib:
— Anavini qaranglar, yana shu yerga osib ketishibdi...- dermish.

Juma kuni kechqurun xotin eriga:
— Adasi, keling shu dam olish kunlari mazza qilib dam olaylik...
Eri xursand bo‘lib xotiniga:
— Bo‘pti xotin, dushanba kuni ko‘rishguncha unda! - degan ekan.