Doda latifalar

Istirohat bog‘idagi kursida ikki nafar iste’fodagi general suhbatlashib o‘tirishibdi:
— Esingdami, Kolya, birinchi jahon urushi yillarida okoplarda ayollar haqida o‘ylamasligimiz uchun bizga tabletkalar berishgan edi?
— Esimda, albatta, pushti tabletkalar berishgan. Tinchlikmi, nega eslab qolding?
— Shunchaki o‘zim... Nazarimda o‘sha tabletkalar endi ta’sir qilyapti shekilli...

Bir piyonista odam baliq oviga borib, qarmoq tashagan ekan, oltin baliq qarmog‘iga ilinibdi-da, har doimgidek oltin baliq uni tilagini bajarishini aytibdi. Faqat u baliq uchta emas, ikkita tilak bajaradigan baliq ekan.
Mast odam baliqqa qarab debdi:
— Menga shunaqa shisha bergin-ki, ichida pivosi bo‘lsin. Qancha ichsam ham tugamasin.
Oltin baliq darrov tilagini bajarib, aytgan shishasini qo‘liga beribdi. Piyonista ichib ko‘ribdi. Yana ichibdi. Pivo hech tugamasmish.
— Zo‘r shisha ekan. Hoy tilla baliq, shu shishadan yana bitta ber, - dermish.

Ikki dugonalar suhbatlashib o‘tirishsa, biri debdi:
— To‘ying qachon?
Ikkinchisi:
— Bilmadim. Yigitim avval meni qarindoshlari bilan tanishtiradi, keyin to‘yimiz bo‘ladi.
— Xo‘sh, qarindoshlarnikiga bordingizmi?
— Ha, eng uzoq qarindoshlari bilan tanishtirishdan boshladi. Kecha hayvonot bog‘ini aylanib chiqdik.

Xo‘randa ofitsiantga qarab debdi:
— Nega hamma ovqatlar aroq hidi kelyapti?
Ofitsiant bir qadam orqaga surilib:
— Endi-chi? Kelmayaptimi? - dermish.

Bir bola do‘stiga qo‘ng‘iroq qilsa, do‘stining onasi go‘shakni ko‘taribdi:
— Allo, kim bu?
— Do‘stim Alisher uydami?
— Ha, u uyda!
— Telefonni unga bera olasizmi?
— Yo‘q!
— Nega axir? Uyda dedingiz-ku?!
— Lekin men ko‘chadaman-da!

Kema kapitani matrosga debdi:
— Kapitan bo‘lishni istaysanmi?
— Ha, albatta!
— Shu daqiqadan boshlab shu kemani kapitanisan. Kema cho‘kyapti. Qoidaga ko‘ra sen kemani oxirgi bo‘lib tark etishing kerak.

Vokzal oshxonasida ikki erkak choy ichib o‘tirishsa, mikrofondan e’lon eshitilibdi: “Diqqat! Poyezd jo‘nab ketmoqda!”
Sherigi narigisiga qarab:
— Iye, poyezdimiz ketib qolyapti, tur!!! – desa, ikkinchisi xotirjam choyini xo‘plab:
— Bilet bizda-ku, qayerga ketardi?! – dermish.

Marshrutkada ketayotgan yo‘lovchilardan biri haydovchiga debdi:
— Ana shu to‘xtab turgan Matizni orqasida to‘xtatib yuboring!
Shu zahoti Matiz yura boshlabdi. Marshrut haydovchisi yo‘lovchiga qarab:
— Matizni ortidan quvlayveraymi? – dermish.

Bir bo‘ri ariza qo‘ltiqlaganicha shoshib-pishib borardi. Yo‘lda bir ayiq uni to‘xtatib so‘radi:
— Ha, bo‘rivoy, yo‘l bo‘lsin?
— Menga qilingan tuhmatlardan rayonga borib dod solaman!
— Senga kim alam o‘tkazdi?
— Ferma mudiri qo‘ylarni o‘zi pinhon suv qilib, akt tuzib, aybni menga to‘nkayveradi.

Bog‘chada bitta bola bor edi. Hammani urardi. Hamma bolalar undan qo‘rqardi. U faqat mendan qo‘rqardi. Chunki men uning har bir mushtiga musht bilan javob qaytarardim. Keyin meni bog‘chadan haydab yuborishdi. Bog‘cha qorovuliga bolalar bilan urishish mumkinmas emish.