Doda latifalar

Rossiyalik olimlar Sibirdagi chanalarga itlarni bog‘lab harakatlanuvchi odamlarni sinab ko‘rish maqsadida, ularga Kamaz berishibdi.
Oradan bir yil o‘tgach, olimlar natijani bilish uchun Sibirga qaytishibdi. Olimlar:
— Ho‘sh, sizlarga bergan mashinamiz yoqdimi? – deb so‘rashsa,
haligi odamlar:
— Ha. Faqat itlarimiz tortishga qiynalishyapti-da... – deyishibdi.

Yomg‘irli kunlarning birida, bir ayol do‘kondan uyiga qaytayotgan ekan. Ortidan bir erkak izma-iz kela boshlabdi. Juda-yam yaqin kela boshlaganini ko‘rgan ayolning o‘takasi yorilay debdi.
Qo‘rquvdan qaltirashga tushgan ayol boyagi erkakka o‘girilib qarasa, erkak:
— Qo‘rqmang! Men shunchaki, yangi etigim loy bo‘lmasin deb, izingizni bosib kelyapman xolos...! – debdi.

Ikkita gadoy kechada o‘tgan-ketganlardan sadaqa so‘rab o‘tirishgan ekan, bir yigit yonlaridan ularga salom berib o‘tibdi. Shunda gadoylardan biri ikkinchisiga:
— Yaxshi bola ekan, nega pul so‘ramading?
Ikkinchi gadoy esa:
— Ey, kaltafahm, agar puli bo‘lsa salom berarmidi...?!

O‘rmondan qo‘ziqorin to‘la savat bilan chiqqan erkak:
— Au, au, au, - deb har yoqqa yugurib yurgan ekan, o‘tkinchilardan biri:
— Nima bo‘ldi do‘stim? Qo‘ziqorindan ko‘proq yeb qo‘ydingmi?, - desa, boyagi odam:
— Yo‘q, Audi mashinamni o‘g‘irlab ketishibdi...

Ikkita juda inoq do‘stlar bo‘lgan ekan. Bir-birini hurmat qilishar ekan.
Avtobusga chiqishda, — Siz chiqing! Yo‘q, avval siz chiqing!" - deb bir-biriga yo‘l berar ekan. Ovqat yeyishsa, — Siz oling! Yo‘q, siz avval oling, - deyisharkan.
Taqdir taqazosi bilan ikkalasi ham bir kunda uylanishibdi. Ikkala do‘stni ayollarining vaqti-soati kelsa ham ko‘zi yorimabdi.
Yigitlar xotinini tekshiruvga olib borsa, homila egizak ekan.
Ikkala ayolni egizaklari ham, — Siz tushing, siz birinchi tushing! - deb yotishganmish.

— O‘g‘lim, akvariumdagi suvni yangiladingmi?
— Yo‘q, oyijon! Baliqchalar hali suvni ichib bo‘lishmabdi.

— Nega quloqlaring bog‘lab tashlangan do‘stim?
— Kiyimlarimni dazmol qilayotgandim, telefon jiringlab qoldi. Telefon deb dazmolni ko‘taribman.
— Ikkinchi qulog‘ing-chi? Unisiga nima bo‘ldi?
— Tez yordamga qo‘ng‘iroq qilaman deb, yana dazmolni ko‘tarib yuboribman-da...

Besh yoshli o‘g‘li adasidan so‘rayapti:
— Ada, nimaga oyimning qorni ishib ketayapti?
Adasi:
— Oying tarvuz yeyayotganida urug‘ini tushirmasdan yegan. Shunga qornida tarvuz o‘sib chiqyapti.

— Ustozing senga qo‘shimcha savol ham berdimi?
— Ha.
— Nimani so‘radi?
— Tentakmisan? dedi.

Oyisi o‘g‘lidan so‘rabdi:
— Oshxonada ikki bo‘lak tort bor edi. Hozir uning bir bo‘lagi qolibdi. Buni menga tushuntira olasanmi?
O‘g‘li:
— Albatta tushuntiraman oyi. Qorong‘i edi shuning uchun ikkinchi bo‘lakni ko‘rmabman...