Дода латифалар

Фавқулотда вазиятлар вазирлиги огоҳлантиради:
Ҳурматли талаба, институт, университет ва академиялар ҳудудида "СЕССИЯ" хавфи кутилмоқда. Айрим фанлардан ставка тезлиги 200 минг сўмгача ошиши ва буни эшитиб сизни мазангиз қочиши мумкин. Пулсиз талабалар учун ҚАЙТАОПАСНО бўлиши мумкин. ЭСЛАТМА: Ҳаражатсиз ҳаракат даражаси - 0 га тенг!

Хотин:
— Дадаси, докторга боргандим. У менга Анталиягами, Малайзиягами ёки Дубайгами бориб, сув бўйида дам олишимни буюрди. Қаерга борамиз?
Эр:
— Бошқа докторга!

Бир куни чол-кампир ёшликни эслашмоқчи бўлишибди. Чол кампирга дебди:
— Мен сени учрашувга чақираман.
Чол учрашув жойига бориб, кампирни бир соат кутибди. Кампирни ёнига қайтиб келиб:
— Нега бормадинг, - деса, кампир:
— Онам рухсат бермадилар, - дермиш.

Эр-хотин телевизор кўриб ўтирсак, ошхонада қолиб кетган қўл телефонимга СМС хабари келди.
Эринчоқлик билан ўрнимдан туриб, секин бориб қарасам, эримдан хабар келибди:
"Хотинжон, модомики ўрнингдан туриб, ошхонага борибсан, битта аччиқ чой дамлаб келақолгин!"

Хотин эрига:
— Адаси мени ҳалиям севасизми? - депти.
Эри:
— Хотинжон, сен-симкартасан, мен-телефон. Телефон сим картасиз ишламайди.
Хотин ўзида йўқ хурсанд бўлиб, ошхонага чиқиб кеса, эри:
— Бечора хотин содда-да! Ҳозирги телефонларга иккита сим карта тушишини билмиди-да, - дермиш.

Оқшом эртагини бу сафар ўғлига отаси ўқиб бермоқда:
— Малика жуда-ям гўзал экан... У шунчалар чиройли эди-ки, шаҳзода бутун оқшом ундан кўзларини уза олмабди.
— Ада, нега шаҳзода маликани кўзларини узиб олмоқчи бўлган???

Севги бу юқумли касаллик бўлиб, у одатда гап отишдан, телефон ва смс орқали юқади. Касаллик аломатлари: кечаси ухламаслик, тез-тез пайнетга бориш. Бу касаллик оқибатида бош оғрийди, юрак сиқилади, ундан сўнг аста-секин пастга тушиб, чўнтакни қуритиб чиқиб кетади.

Университетни тамомлаган чиройли, ёш қиз мактабга немис тилидан дарс бериш учун келибди. Мактаб директори ёш ўқитувчини текшириш мақсадида, у дарс ўтаётган хонага кириб, охирги партадаги ўқувчининг ёнига жойлашибди. Ёш муаллима доскага немис тилида жумла ёзиб, болалардан сўрабди:
— Қани, ким доскадаги ёзувни таржима қилади?
Орқа партада, директорни ёнида ўтирган бола қўлини кўтариб:
— Бугун учрашсак бўладими? деб ёзилган устоз, - деса, ўқитувчини жаҳли чиқиб:
— Нима? Вой тарбиясиз-ей! Нарсаларингни йиғиштир-да, йўқол!!!
Бола нарсаларини йиғиштириб, директорга қараб, йиғламсираб дебди:
— Немисчани таржима қилишни билмаскансиз, нима қилардингиз менга ўргатиб?!...

Бир куни афанди эшагини тўсатдан йўқотиб қўйибди. Ҳамма ёқни қидирибди, топа олмабди. Охири зоопаркка айланишга бориб зебрани кўриб қолибди-да унга қараб:
— Ҳа эшак, кўйлак кийсанг ҳам танидим сени! - дермиш.

Қишлоқдан шаҳарга келган содда бир одам овқатланиш учун кафега кирибди. Менюни кўриб чиқгач, официантга битта гриль буюртирибди.
Беш дақиқадан кейин официант чой, нон ва бир пиёла соус олиб келибди. Бироздан сўнг официант грилни олиб келса, ҳалиги одам нон билан соусни еб бўлган эмиш. Официантни қўлидаги грилни кўргач:
— Товуқ борлигини олдинроқ айтсанг бўлмасмиди?! Мен грилга тўйиб олибман, – дермиш.