Дода латифалар

Ёш ўсмир йигит уйга бир қулоғига зирак таққан ҳолда кириб келибди.
Отаси буни кўриб:
— Ўғлим, қадим-қадимдан зиракни ё қароқчилар, ё ҳезалаклар таққан. Ҳозир деразадан ташқарига қарайман, агар ташқарида кемангни кўрмасам, энангни Учқўрғондан кўрсатаман.

Ўқитувчи Болтавойдан сўрабди:
— Катта бўлсанг ким бўласан?
Болтавой жавоб берибди:
— Ихтирочи бўламан. Бир кнопкани босса, ҳамма ишни бажарадиган робот ихтиро қиламан.
— Яхши, сен нима ихтиро қиласан Тешавой.
Тешавой уйқусираб жавоб берибди:
— Мен ўша кнопкани босадиган аппарат ихтиро қиламан...

Дўстлар суҳбатидан:
— Ойлик маошинг яхшими?
— Чидаса бўлади. Дастурхонимиздан икра аримайди.
— О, зўр-ку! Икрани қизилиданми ёки қорасиданми?
— Бақлажонли! Хотиним пиширган!!!

Хитойлик қизни севиб қолган ўзбек йигити қизнинг отасига дебди:
— Қизингизни қўлини сўраб келдим. Менга турмушга чиқишига рухсат беринг!
Хитойлик ота жавоб берибди:
— Аждодларимиз каби бу ишни буюк аждар билан маслаҳатлашиб, кейин айтаман.
Йигит қувониб дебди:
— Овора бўлманг! Рафиқангиз билан гаплашиб бўлдим...

Суратхонага 7 та боксёр кириб келибди ва суратчига дейишибди:
— Бизларни 3 га 4 суратга олиб қўйсангиз. Ҳар биримизга 2 донадан чиқариб берасиз.
Суратчи рози бўлибди. Суратга тушириш учун чироқларни ёқиб, фотокамерасини созлаб турса, 7 та боксчиларнинг 4 таси бир тараф, 3 таси бир тараф бўлиб олиб, муштлашишга шай туриб олишганмуш.
Вазиятдан қўрқиб кетган суратчи:
— Ҳой-ҳой, тўхтанглар! Нима қиляпсизлар?! - деса, боксчилар:
— Суратга олаверинг! Тренеримиз бизларга "3 га 4 суратингизни 2 донадан олиб келасизлар деган" дермуш...

Брюс Ли Ўзбекистонга келиб, Юнусободдаги Stroy Mir ни айланиб юрса, қурилиш асбоблари дўконида ломни кўриб қолибди. Брюс Ли ўзини кўрсатиб қўймоқчи бўлиб, сотувчи чолга қараб туриб, ломни қўли билан қайириб ташлабди-да, жойига қўйибди. Жаҳли чиққан чол:
— Олмасанг нима қиласан тегиб, - дебди-да, ломни яна текислаб қўйган экан.

Бир куни афанди чайнаган сақичини бурнига ёпиштириб кетаёса, қўшниси кўриб қолиб:
— Ие, ҳа афанди тинчликми?! Бурнизга сақични нега ёпиштириб олибсиз, - деса, афанди пинагини бузмай:
— Эй тақсир, мен бир камбағал одам бўлсам... Камбағал одамни эса бойлиги кўзини ёнида туриши керак, - деган экан.

Ўқитувчи ўқувчидан сўради:
— Каримжон,нега ўтган куни мактабга келмадинг?
— Ойим шимимни ювиб қўйган эканлар. Бора олмадим-да...
— Кеча-чи, кеча нимага келмадинг?
— Мактабга кетаётиб, уйингиз ёнидан ўтдим. Қарасам, кўйлагингиз жиққа хўл илиниб турган экан. Сизни мактабга бормасалар керак деб ўйлабман.

Икки ит учрашиб қолишибди. Бири иккинчисига дермиш:
— Хўжайинимни шу қадар қўлга ўргатиб олдимки, сўрашиш учун ҳар гал панжамни кўтарсам, гўшт берадиган бўлди.

Японлар битта сўкинганда 1 дақиқа минут олдинга ўтиб қоладиган соат ихтиро қилишибди. Текшириш учун соатни япон барига илиб кўришибди. Эртасига қарашса 2 дақиқа олдинлабди. Кейин рус барига илиб кетишибди. Эртасига қарашса, 20 дақиқа олдинга ўтиб қолибди. Охири ўзбек чойхонасига илишибди. Эртасига қарашса, соат йўқ эмиш.
— Соат қани? - дейишса, чойхоначи:
— Э, у соатмиди? Биз қишда вентилятор нимага айланиб турибди деб олиб ташлабмиз...- дермиш.