Doda latifalar

Bir qiz kursdosh dugonasiga gapirib beryapti:
— Kecha yigitim bilan aylanib yursak, uni avvalgi sevgan qizi uchratib qoldik. U qiz menga qarab “Mendan nimasi ortiqcha buni?” desa bo‘ladimi!
Dugonasi qiziqib:
— Xo‘sh? Sen nima deding? – so‘rabdi.
— O‘ylab o‘tirmay yigitimni ko‘rsatib “mana nimam ortiqcha” dedim.

Boyib ketish niyatida tadbirkor bo‘lishni reja qildim. Biznes reja ham ishlab chiqdim. Keyin bilsam, soliq kodeksida men uchun rejalar allaqachon yozib qo‘yilgan ekan.

Eng yaxshi kun – Ertaga!
Ertaga chekishni tashlayman! Ertaga sport bilan shu-ullanishni boshlayman! Ertaga diyetaga “o‘tiraman”! Ertadan o‘qishni boshlayman! ...

Ayollarning muammosi – erkaklar. Lekin erkaklarni o‘zlari dunyoga keltiradi.
Demak, ayollar o‘zlarining muammolarini o‘zlari yaratar ekanlar.

Vaqt allamahal bo‘lganda darvozadan kirib kelgan o‘g‘lini oldidan otasi chiqib jahl bilan debdi:
— Qayerlarda yuribsan? Soat nechi bo‘ldi?! Yuravermaysanmi ertalabgacha sang‘ib!!!
Bu gapni eshitgan o‘g‘li shu zahoti cho‘ntagidan telefonini olib, kimgadir qo‘ng‘iroq qilib:
— Allo, o‘rtoq ketib qolmadingmi? Ruxsat oldim. Hozir chiqaman, - debdi.

Bir odam ishdan uyga qaytsa, uyida o‘g‘ri yurganmish. Bundoq qarasa o‘g‘ri juda bo‘ychan, yelkalari katta, baquvvat emish. Yerda yotgan tayoqni qo‘liga olib:
— Yaxshi-yam shunaqa katta ekansan. Bo‘lmasa qorong‘ida seni ko‘rmas edim. Ko‘zoynagim ishxonamda qolib ketibdi, - dermish.

Ikki do‘st suhbati:
— Sen 22 dekabr kuni qaysi deputatlarga ovoz bermoqchisan?
— Senga ovoz bersammikan?!
— Nima? Qanaqasiga? Mumkin emas-ku!
— Ha, endi... Har holda seni taniyman-da...!

Yangi Cobalt mashinasi svetorofda to‘xtasa, orqasidan eski Matiz kelib qarsillatib uribdi. Cobalt egasi tushib qarasa, Matizni oynalari tonirovka qilingan ekan. Borib oynalarni sindirguday qilib ura boshlabdi. Bir payt Matizni oynasi tushirilgan ekan, ichida yuzi shram, hamma yog‘iga tatuirovka chizilgan, yuzi “sovuq”, qo‘lida to‘pponchasi bor kishi o‘tirgan ekan.⠀
Cobalt egasi unga qarab:⠀
— Boyadan beri mashinangizni pulini to‘lash uchun sizni chaqiryapman. Qancha bo‘ladi? - dermish.

Hozir zamon shunaqa! Sodda emasligingni isbotlash uchun tizzalari yirtiq shimni butun shimdan qimmatroqqa sotib olishing kerak.

Ikkita kayfi oshib qolgan ulfatlar yarim tunda uyga qaytayotib biri debdi:
— Garov o‘ynaysanmi? Hozir meni xotinim eshikni “Jonim” degan so‘z bilan ochadi.
Ikkinchisi:
— Nimalar deyapsan? Sen o‘lgudek mastsan! Yarim tunda uyga qaytyapsan? Qanaqasiga xotining “Jonim” desin!?
— Hozir ko‘rasan! – debdi-da, eshik qo‘ng‘irog‘ini bosib debdi:
— Eshikni och jonim...
Xotini bo‘lsa:
— Jonim?! Hozir ta’ziringizni beraman! – deb eshikni ochgan ekan.