Doda latifalar

— Allo, allo! Yordam bering. Men qo‘lni sindirib qo‘ydim.
— Men vrach emasman. Advokatman. Vrachga qo‘ng‘iroq qiling!
— Menga advokat kerak. Singan qo‘l meniki emas!

Yoz faslini to‘xtatib turinglar! Men dam olishga ulgurmadim!

Farroshlik qilish uyat!
Avtobusda chiptachi bo‘lib ishlash uyat!
Paynetda ishlash ham uyat!
Ko‘chada g‘iybat qilib, bekorchi bo‘lib o‘tirish uyatmas!

— Budjet pullarini o‘g‘irlaysizmi?
— Ha, nima edi?
— Bilib qolishsa-chi?
— Mana siz bildingiz-ku, xo‘sh?!

Daryoni narigi qirg‘og‘ida yashaydigan bo‘riga quyon sohilni bu tarafida har kuni turib olib:
— Hoy bo‘ri, o‘t bu yoqqa! - deb maqtanar ekan.
Bir kuni jahli chiqgan bo‘ri daryoni suzib o‘tib quyonni orqasiga berkinib olibdi.
— Hoy bo‘ri, o‘t bu yoqqa! - deyishi bilan bo‘ri:
— Mana o‘tdim! Nima deysan endi?! - desa, quyon:
— Yuring, choyga chaqirgandim, - dermish.

Matematik fokus:
Istagan sonni o‘ylang. Uni 3 ga ko‘paytiring. Natijadan 7 ni ayiring.
Keyin 6 ga ko‘paytiring va 76 ni qo‘shing. Endi hisoblash uchun ko‘zlaringizni yuming. Qop-qorong‘u! Topdimmi?!

— Boshlig‘imiz ish vaqtida internetda o‘yin o‘ynab o‘tirganim uchun mukofot pulidan meni mahrum qildi.
— Nega unga o‘yin o‘ynab o‘tirganingni sezdirding?
— Qanaqasiga sezmasin. Internetdagi o‘yinda raqibim boshlig‘im bo‘lib chiqdi.

TATU talabalari o‘ta aqlli robot yaratishdi.
Robot karantin tugashi bilan Grin karta o‘ynab, AQSHga ketmoqchi ekanini aytibdi.

Chekka viloyatdan Toshkentga jo‘nayotgan avtobusga bir yigit chiqib haydovchidan so‘rabdi:
— Aka, avtobus Toshkentga boradimi?
— Ha, boradi, - debdi haydovchi.
Yigit bo‘lsa:
— Ichidagi yo‘lovchilarichi? - debdi.

Avtobusda ketayotgan ayolning yonidagi nabirasi kutilmagan savollarni bera boshlabdi:
— Buvijon, yoshingiz nechida?
Ayol atrofdagilardan xijolat bo‘lib nabirasini chalg‘itsa ham bolakay xiralik qilaveribdi:
— Yoshingiz nechida buvijon? Ayting. Mayli, birinchi raqamini ayting!
— Olti, - debdi ayol.
— Ikkinchi raqami-chi?
— Besh, - debdi ayol.
— Uchinchi raqami-chi? - debdi bolakay yana.