Дода латифалар

Диққат савол.
Қариндошликнинг коррупцияга таъсири қандай?
— Аҳмедов, жавоб бер-чи!
— Билмайман устоз!
— Ўтир беш!
— Раҳмат, ада.

Акаси синглисига дебди:
— Косадаги мураббони еб қўйганимни ойимга айтмагин!
Ойиси ишдан келса, синглиси дебди:
— Ойижон, акам мураббони еб қўйганини сизга ҳеч қачон айтмайман!

Бир куни Хўжа Насриддинга дейишибди:
— Насриддин, сизни хотинингиз ақлдан озибди!
Хўжа Насриддин чуқур ўйга ботибди.
Ундан сўрашибди:
— Нимани бунчалик ўйлаб қолдингиз?
Насриддин:
— Хотиним ўзи туғилганида ақлсиз эди. Қандай қилиб ақлдан озиши мумкин деб ўйлаб қолдим, - деган экан.

Бир одам кўзи ўткирлигини мақтанмоқчи бўлиб:
— 25 метр наридаги дарахтда чумоли кетяпти, - деса, ёнидагиси:
— Ҳа, ўғил бола экан, - дермиш.

Битта олифта йигит такси тўхтатиб:
— Ахлат ташийсизми? – деса, таксичи:
— Ўтир, айтган жойингга ташлаб қўяман, - дермиш.

Бир киши қариндошиникига бормоқчи бўлиб, йўлдан адашиб қолибди.
Манзилни сўраш учун қариндошига қўнғироқ қиламан деб, адашиб дўстига қўнғироқ қилиб юборибди. У дўсти ҳазилкашроқ экан.
— Алло, уйингни топа олмаяпман... – деса, дўсти ҳазиллашиб:
— Қаерда турибсиз? – дебди.
Меҳмон:
— Мозорни олдидаман. Қаерга юрай? – деса, дўсти:
— Ичкарида ётибман, кираверинг! – дермиш.

Товуқ беданага мақтаниб:
— Мени тухумим 500 сўм, сеники 300 сўм. Мени тухумим сеникидан каттароқ...
Сен ҳам менга ўхшаб 500 сўмлик туғсанг бўлмайдими? – деса, бедана дебди:
— Энди..., 200 сўм учун жонимни оғритиб нима қиламан?!

Қанийди, тушимда ишлайверсам-у, ўнггимда маош олаверсам!

Агар хотинингиз сизга сакрай бошласа, жим турманг. Ўзингизни ким эканлигизни кўрсатиб қўйинг. Ошхонага кирганингизда минғир-минғирини бошласа, шарт этиб идишларни ювиб, овқат пишириб қўйинг. Ваннага кирганизда гапирса, пайпоқларни чайиб қўйинг. Дазмол, чангютгич ҳам хотинизга қарши курашиш қуролларига айлансин. Урушишга баҳона тополмай бир алам қилсин!

Лофга жуда уста балиқчилар суҳбати:
— Кеча қармоқни зўрға тортиб уч метрлик сомни чиқариб олдим!
— Сеники ҳолва! Кеча мени қармоғимга XVIII асрда ишланган катта фонус илиниб чиқди. У ҳалиям ёниб турган экан!
— Майли мен сомни узунлигини қисқартираман. Фақат илтимос, сен ҳам фонусингни ўчган экан деб айт!