Дода латифалар

Ўрмонда очлик бошланиб, арслон егулик топа олмай қолибди.
Шунда арслон ҳамма ҳайвонларни бир жойга йиғиб шундай дебди:
— Энг қўрқоқ, энг кичкина ҳайвондан ейишни бошлайман! Ўзинг билиб ўртага чиқавер!
Бир пайт қуён ўртага сакраб чиқиб:
— Нега арслон акамни кутишга мажбур қиласанлар?! Ўзларинг билиб, тезроқ чиқмайсанларми?! – дермиш.

Бир аёл шаҳарни ўртасидаги пиёдалар йўлакчасидан сигир етаклаб кетаётса, милиция ходими уни тўхтатиб дебди:
— Ҳурматли фуқаро! Бу йўлак фақат пиёдалар юриши учун мўлжалланган.
Аёл бир сигирга, бир милицияга қараб:
— Сигирим велосипед ҳайдаб кетаётгани йўқ! Пиёда кетяпти, - деган экан.

Иккита қўй ҳайит байрамидан олдин гаплашиб туришибди:
“Уйда бўл, далада бўл ҳайит куни қассобхонада бўлмасанг бўлди!”

Бир куни ёш йигит кўчада кетаётса, ёнидан чиройли қиз ўтиб қолибди.
Йигит:
— Қани энди, сизди олдингизга бемор бўлиб борсам-у, сиз мени даволасангиз... – деса , қиз ортига ўгирилиб:
— Яхши йигит, мен туғруқхонада ишлайман, - дермиш.

Бир эркак 12 йил деганда қамоқдан чиқиб уйига келса, хотини сўраётганмиш:
— Қамоқдан соат нечида чиқган эдингиз?
Эри:
— Соат 11 лар эди чамаси... Кейин милицияга бориб рўйхатдан ўтдим. Кейин ота-онамни кўргани бордим, кейин ... – деб гапираётса, хотини:
— Ҳозир соат 4 бўлди. Шунақа-ям кеч келадими одам деган? Қаерларда дайдиб юрибсиз? Уйга вақтида келасизми-йўқми ўзи?! – деб жанжал кўтара бошлабди.
Шу пайт боши оғриб кетган эри сумкасини олиб, секин ташқарига чиқиб кетаётса, хотини:
— Қаёққа яна?! – дебди.
Эри бўлса:
— Бориб бирорта дўконни ўмараман. Менга ўша ёқ тинчгина экан... – дермиш.

Бир одам уйида ўтирган экан, эшик тақиллаб қолибди.
Тирқишдан қараса, МИБдан келишган экан. Уй эгаси жим тураверибди.
Шунда МИБ ходимлари:
— Бизда янги аппарат бор. Уйда одам борлигини кўрсатяпти. Очинг эшикни! – дейишибди.
Ҳалиги одам ҳайрон бўлиб, эшикни очибди-да:
— Қани, кўрсатингларчи... - дермиш.

Бир хонадон қизига иккита йигитдан баравар совчи келибди.
Йигитлардан бирининг онаси дебди:
— Қизингизни мени ўғлимга беринг.
Иккинчи йигитни онаси дебди:
— Йўқ, қизингизни мени ўғлимга беринг.
Икки йигитнинг онаси узоқ тортишибди. Бундан чарчаб кетган қизнинг отаси ҳар иккала қайнонага дебди:
— Ҳозир қизимни олиб чиқиб иккига бўлиб ташлайманда, бир қисмини сизга, иккинчисини эса сизга бераман!
Биринчи қайнона рози бўлиб:
— Тўғри! Шундай қилиш керак! – дебди.
Иккинчи қайнона:
— Бу нима деганингиз?! Ундай қилманг, ахир қизда гуноҳ йўқ, - дебди.
Шунда қизнинг отаси:
— Бўлди қизимни биринчи йигитга бераман, - деса, иккинчи йигитнинг онаси:
— Нега ахир? У ҳозиргина сизни қизингизни иккига бўлишга рози эди-ку!? – деса, қизнинг отаси:
— Ана!!! Шу аёл қизимни ҳақиқий қайнонаси экан! Чунки қайноналар ҳар доим келинини бурдалаб ташлашга тайёр туришади, - дермиш.

— Дўстим, мен учун ҳаёт тамом! Севган қизим мени ташлаб кетди!
— Ҳа...! Жуда ёмон бўпти. Ер юзида биттагина қиз бор эди-я... Лекин энди ақлинг ишлай бошлайди!
— Нега ер юзида битатгина қиз бўлар экан?! 4 миллиард қиз бор-ку!
— Ана кўрдингми?! Ақлинг ишлай бошлади.

— Сизнинг ўрнингизда бўлганимда, бу эркак билан гаплашмаган бўлардим. Қандайдир шубҳали кимса...
— Кечирасиз, лекин бу - мени эрим бўлади...

Ресторанда овқатланиб ўтирган мижоз ёнига официант югуриб келиб дебди:
— Илтимос, балиқни тезроқ еб тугатсангиз!
Мижоз:
— Нимага? – дебди ҳайрон бўлиб.
Официант:
— Ресторанимизга СЭСдан текширув келди, - дермиш.