Дода латифалар

Бир бола отасига мақтаяпти:
— Ада, синфдаги энг ялқов бола энди мен эмасман!
— Нега? Яхши ўқий бошладингми?
— Йўқ, бугун мендан ҳам ялқовроқ бола келди синфимизга!

Учта йигит бир кунда уйланибди. Бир ҳафтадан кейин йигитлар чойхонада йиғилишибди.
Биринчи уйлангани Malibu ҳайдаб келибди. Иккинчиси янги уй олганини айтибди. Учинчисидан:
— Сенга қайнотанг нима олиб берди? - дейишса, йигит:
— Мени хотиним овқат қилиш, кир ювиш, дазмол қилиш, хуллас ҳамма ишларни билар экан, - дебди.

Бир йигит ўз хонадонида ўтирган эди. Эшик қўнғироғи жиринглабди. Эшикни очиб қараса, бир қиз турибди. Йигит:
— Келинг, хизмат? - деса, қиз:
— Кечирасиз, мен рўпарадаги уйданман. Сиз ҳар куни дурбинда мени кузатиб турган хонадонда яшовчи қизман. Айтинг-чи, кеча мен телефонимни наушникларини қаерга ташлаб кетдим? - дермиш.

Бир эркак дўстига:
— Хотинимга яна бир маротаба хиёнат қилсам, ўзини ўлдиришини айтди.
Дўсти:
— Энди хиёнат қилмаяпсанми?
— Энди бу ҳакда унга сездирмаяпман. Ҳозиргача уни етти маротаба ўлимдан сақлаб қолдим.

Бир куни бошлиқ қўл остидаги ишчисининг уйига меҳмонга келибди. Қафасдаги тўти бошлиққа қараб ҳадеб:
— Сен аблаҳсан, сен аблаҳсан, - деяверибди.
Жаҳли чиққан бошлиқ ишчисига қараб:
— Агар мана шу тўтингни қовуриб келсанг, сенга истаганингча пул бераман, - дебди.
Ишчиси тўтини олиб, ошхонага чиқибди. Тўтига раҳми келиб, музлатгичдан товуқ гўштини олибди-ю, қовурибди. Тўтини эса ошхонада стол остига яшириб қўйибди.
Товуқ гўштини тўтиники деб ўйлаб, паққос туширган бошлиқ энди эшикдан чиқиб кетаётса, ишчиси:
— Хўжайин, пулларни бермайсизми? - деса, бошлиқ:
— Қанақа пул? Нима деяпсан?! - деб ўдағайлай бошлабди. Шу пайт ошхонадан:
— Айтмадимми, сен аблаҳсан деб! - дермиш тўти.

Болакай телевизор кўриб ўтирган адасини ёнига келиб:
— Ада нима кўряпсиз?
— Енгил атлетика бўйича югуриш мусобақасини ўғлим. Ҳозир ҳаммаси югуради, биттаси ғолиб бўлади. Ана шу битта спортчига совринни беришади.
— Ундай бўлса қолганлари нега югуришяпти ада???

Энг пухта режа:
"Бир гап бўлар! Борганда, жойида ҳал қилармиз!"

Жиннихонада беморлар телевизордан янгиликларни кўриб ўтиришса, бир бемор:
— Яхши-ям жиннихонада ётган эканман..., - деса, иккита врач унга қараб:
— Соғая бошлаганга ўхшайди, - дермиш.

Ўзбек тилини яхши билмайдиган бир йигитнинг юраги оғриб қолиб:
— Қалбим оғрияпти, қалбим оғрияпти, - деб йиқила бошласа, дўсти:
— Қанчалар гўзал сўзлар...! - деб қараб тураверибди.
Нарироқда бошқа дўсти тушуниб қолиб:
— Эй аҳмоқ, бор "Тез ёрдам" чақир! - дермиш.

— Дўстим, уйланаётган эмишсан, табриклайман! Келин қалай? Ёқдими?
— Биласанми, ҳаммани фикри ҳар хил... Онамга, холамга, аммаларимга ёқди, менга эса йўқ!