Дода латифалар

Бир бемор докторга келиб:
— Қорним оғрияпти, дори беринг, - деса, доктор шошилганидан итига олган дорини бериб юборибди.
Бир ҳафтадан кейин бояги бемор яна келиб:
— Доктор, менга берган дорингизни номи нима эди? Ҳеч қайси дорихонадан топа олмаяпман, - дермиш.

Бир қиз дугонасига:
— Ўзингга йигит топишинг учун кўчага ясанган ва хушчақчақ ҳолда чиқ! Чунки кўчада ўзига қарамаган ва ғамгин аёлларнинг барчаси турмушга чиқганлар бўлади!

— Сенга умрингда бирортаси "гўзал" деб айтганми?
— Ҳа. Бозорда, — Картошкадан олиб кетинг, гўзал қиз! - деб айтишган...

— Ойижон, келинг, ўйин ўйнаймиз.
— Қанақа ўйин?
— «Ҳайвонот боғида» деган ўйин. Биз қафасдаги ҳайвонлар бўламиз, сиз эса томошабин бўлиб бизга олма, конфетлар ташлайсиз.

— Қўйсанг-чи Азиз, нима қиласан уни?! Кичкиналигини қара!
— Бошимни қотирмасдан бер бу ёққа ойликни!

— Айтгинчи дўстим, пулларимни қаерда сақласам бўлади? Банкдами ёки уйдами?
— Эҳ оғайни, мени чўнтакларим хизматингга тайёр!!!

Учта талаба қиз битта уйда туришар экан. Улардан бири рус, бири турк, учинчиси эса ўзбек экан.
Бир куни ёмғир ёға бошлабди. Рус қиз сайр қилгани чиқиб кетибди, турк қизи - деразани очиб ёмғирни томоша қила бошлабди.
Ўзбек эса:
— Вой, кирларимни дордан йиғиб олай!, - деб ҳовлига югуриб чиқиб кетибди.

Телефонда танишиб қолган йигит ва қиз суҳбатлашишмоқда:
— Яхши қиз, бўйингиз баландми?
— Бўйим 145 сантиметр.
— Вой, жажжигина малика экансиз-да... Вазнингиз-чи?
— Вазним ундан ҳам камроқ 130.

Миллионлаб инсонлар телефон наушникларини сими чигал бўлаверишидан азият чекади.
Шунинг учун Apple компанияси Iphone7 учун симсиз наушникларни ишлаб чиқарди. Энди улар чигал бўлмайди — шунчаки йўқолиб қолади.

Эр-хотин хиёбонда айланиб юришган экан. Эр ҳар замонда — Эшитаман, азизам, - деб кетармуш.
Хотинини жаҳли чиқиб:
— Агар яна бир мартта қарғани "қағиллашига", — "Эшитаман, азизам" десангиз, мендан яхшилик кутманг дебди.