Дода латифалар

Қаюмов Аҳад деган бир йигит синфдошларидан ҳеч қачон аввал фамилияси кейин исмини айтиб чақирмасликни илтимос қилибди.

Бир ўғри олтин балиқни тутиб олибди.
— Тила тилагингни! Хоҳлаган нарсангни муҳайё қиламан, - дебди балиқ.
— Қўлингдан нима келади ўзи? - дебди ўғри.
— Ҳамма нарса. Мана масалан кеча бир йигит мендан 100 минг доллар сўради, бердим, - дебди балиқ.
Ўғри ўйланиб туриб:
— Шу йигитни уй манзилини бер менга, - деган экан.

Судя:
— Нега сиз нуқул кундуз куни ўғирлик қилгансиз?
Айбланувчи:
— Кечаси кўп пул билан юришга қўрқаман-да.

Бола адасига:
— Сиз уйда кимсиз?
Адаси:
— Мен бу уйда директорман.
Кунларнинг бирида бола адасига:
— Ада, сиз хизмат сафарига кетганингизда уйимизга янги директор келди...

Икки талаба суҳбатидан:
— Тинчликми, нега хомушсан?
— Севган қизимга iPhone 11 олиб бериш учун 1 йил пул йиғган эдим. Кеча шу пулга овқат олиб еб қўйдим.
— Овқат? Ўзи нечи пул йиғган эдинг?
— 18 минг сўм.

Қизи:
— Ада, мен дўстимни уйига дарс тайёрлагани кетяпман.
Отаси:
— Ўйда ўтир! Ҳеч қаерга бормайсан! Онанг ҳам 15 йил олдин бизникига дарс тайёрлагани келган эди, ҳалигача кетказолганим йўқ!

Боғча болалари касалликка қарши эмланибди. Бир болакай спиртли пахтасини олиб ҳидлаётганмиш.
— Нега унақа қиляпсан? - дейишса, болакай:
— Адамни ҳиди келяпти, - дермиш.

Бемор истималаб касалохонага келибди. Уни кутиб олган ҳамшира сўрабди:
— Шиппак олиб келдингизми?
— Ҳа.
— Кийимларингизни олиб келдингизми?
— Ҳа.
— Кўрпа ва ёстиқларимиз қолмади. Олиб келдингизми?
— Ҳа.
— Мана бу рўйхатдаги дорилар ҳам қолмаган. Олиб келдингизми?
— Ҳа.
— Ёнингизда турган оқ халатли йигит ким?
— Ҳар эҳтимолга қарши врачни ҳам ўзим билан олиб келдим.

Психолог аёл кишидан сўрабди:
— Қайси аёл эрини қандай бўлса шундайлигича қабул қилади?
Аёл:
— Фақат ер қабул қилади, - деб жавоб берган экан.

Эрдан хотинига СМС:
— Хотин, ишхонада оёғимга темир тушиб кетди. Мафтуна шифохонага олиб келди. Энди оёғимни кесишар экан...
Хотиндан СМС:
— Мафтуна ким?!