Doda latifalar

— Ma’ruzachi ichkilikning zarari to‘g‘risida ajoyib ma’ruza qildi, to‘g‘rimi? Hozir borib buni o‘ziga aytaman.
— Siz u bilan tanishmisiz?
— Bo‘lmasamchi!? Har kuni birga ichamizku!

Qadim zamonda podshoh birining saroyi oldida xalq yig‘ilib, shovqin-suron ko‘taribdi.
Podshoh ayyonlardan so‘rabdi:
— Tashqarida nima bo‘lyapti?
— Xalqingiz sizga minnatdorchilik bildirish uchun kelibdi, - debdi ayyonlar.
Podshoh:
— Nega ular "Bo‘ldi bas!", "Yetar!", "Ortib ketdi" deb baqirishyapti, - desa, ayyonlari:
— Hamma narsa yetarli, ortig‘i bilan muhayyo, to‘kin-sochinlik bo‘lgani uchun aytishyapti bu so‘zlarni, - degan ekan.

AQSH, Germaniya, Britaniya hukumati:
— Ko‘chaga chiqmang! Uyda qoling!
Xalq:
— Qanaqasiga? Qaysi pulga yeb-ichamiz?
Hukumati:
— Uyda qoling! Mana sizga pul!
Rossiya hukumati:
— Uyda qoling!
Rossiya xalqi:
— Nima? Biz uyda o‘tirsak, kim bizni boqadi?
Hukumati:
— Karantin qoidalarini buzganingiz uchun mana sizga jarima varaqlari, to‘lab qo‘ying!

Bo‘g‘irsoq bilan quyon duelga chiqibdi.
Quyon:
— Quloqqa otish yo‘q!
Bo‘g‘irsoq:
— Unday bo‘lsa, boshga otish ham yo‘q!!!

Bir qizning telefoniga notanish raqamdan SMS keldi:
— Sevganing bormi?
— Ha, bor! Kim bu?
— Bu men, otangman! Sen bilan uyda gaplashaman!
5 daqiqadan so‘ng yana SMS kelibdi:
— Sevganing bormi?
— Yo‘q! Kim bu yana?
— Bu men, yigitingman! Bu nima deganing? Demak mendan or qilar ekansan-da!...

Onasi:
— Nega kundaligingda faqat 2 va 3 baholar turibdi. 5 olasanmi o‘zi yo yo‘qmi?!
Bola:
— Axir 2 ga 3 ni qo‘shsak 5 ku oyijon!

— Hoy egachi, o‘g‘lingizni uylantiribsiz. Bunday chiroyli ham aqilli qizni qayerdan topdingiz?
— Voy o‘rgilay... Institut darvozasi oldida tursam, bir to‘da qizlar chiqib kelishyapti. Shunday oldiga borib, chiroylilar chapga, aqllilar o‘ngga o‘tsin dedim. Hammasi o‘tdi. Faqat bitta qiz u tarafdan bu tarafga yugurib o‘ta olmay turgan edi. Undan so‘radim:
— Nega bir tarafga o‘tmayapsan? – desam, u qiz:
— Bir o‘zim har ikkala tarafga qanday o‘ta olaman? – dedi. Keyin shu qizni kelin qildim.

Bir bolakayning otasi ichib kelibdi. U otasiga:⠀
— Dada, nega ichasiz? – desa, dadasi:⠀
— O‘g‘lim sen hali bunday narsalarni tushunmaysan. Katta bo‘lsang ichasan.⠀
Oradan yillar o‘tib o‘g‘li choyni ichib turib dadasiga qarab debdi:
— Dada, mana men ham ichdim.

Bitta odam ishga naqd 1 soat kechikib kelibdi. Ishxonaga kiraverishda uni uchratgan rahbar tanbeh beribdi:
— Nega kech qoldingiz?
— Kechirasiz, 3-qavatdan yiqilib tushdim, - debdi haligi odam.
Rahbarni battar jahli chiqib:
— Nima, bir soat tushdingizmi pastga?! – dermish.

Har kuni o‘rmonda ayiq quyonni tutvolib do‘pposlar ekan. Xullas, jonidan to‘yib ketgan quyon sherni oldiga borib, ayiqni qilmishlaridan shikoyat qilibdi. Shunda sher farmon chiqazibdi. Unga ko‘ra ayiq quyonni urmasligi to‘g‘risida tilxat yozib berishi kerak ekan. Ertasi kuni ayiq quyonni urgani kelayotsa, quyon farmonni ko‘rsatibdi. Shunda ayiq:
— Bugun ham urib olay. Ertaga urmaslik haqida tilxat yozib beraman, - debdi. Ertasiga yana uribdi va indinga urmaslik haqida tilxat yozib beribdi.
Bir hafta o‘tgandan keyin sher quyonni ko‘rib qolib:
— Ayiq urmayaptimi endi? - deb so‘rabdi.
Quyon:
— Eh, urishi o‘sha-o‘sha. Faqat qog‘oz ko‘payib ketdi, - dermish.