Дода латифалар

Бир киши ярим кечаси қоронғу кўчадан кетаётган экан, йўлидан безорилар чиқиб дебди:
— Қўлингдаги тилла соатни еч!
Ҳалиги киши:
— Вой дод! Ёрдам беринглар!!! - деб бақира бошласа, йўлтўсарлар:
— Ие, ҳали сени тилла тишинг ҳам борми?! - деган экан.

Бир киши Россияга кетмоқчи бўлиб йўлга отланибди-да, ўғлини ёнига чақириб дебди:
— Мен ишлаш учун узоқларга кетяпман. Онангга қараб юр. Агар бегона эркак билан гаплашса, ҳовли этагига қурган янги иморатдан битта ғишт олиб қўясан. Қайтгач, шу иморатга қараб ўзим билиб оламан.
Орадан бир йил ўтиб, ҳалиги киши уйига қайтса, ўғли йўқ эмиш.
— Ўғлимиз қани? - деб сўрабди хотинидан.
— Жиннихонада ётибди. Янги қурган иморатни йиқитавериб, жонга тегиб кетди, - дермиш хотини.

Эр-хотин заргарлик дўкони ёнидан ўта туриб:
— Адаси, уят эмасми, нуқул битта зиракни тақиб юрибман, - дебди хотини.
— Пайпоғимни кўрсатайми хотин?! - дермиш эри.

Афанди уйида ўтириб хаёлан қўй гўшти солиб пиширилган шўрва ичишни орзу қилиб ўтирарди. Қўшнисининг ўғли коса кўтариб чиқиб қолди ва деди:
— Амаки, агар шўрва қиладиган бўлсангиз, ойимгаям бир коса бераркансиз. Мазалари йўқ.
Шунда Афанди ўзича ғудраниб қўйди:
— Тавба, бу уйда орзу қилиб ҳам бўлмайди-я! Дарров қўшнилар эшитади.

Афанди эшакни устига ўтириб олиб, битта қопда туз юклаб кетаётса, йўлда учраган одамлар:
— Эшакни қийнаб қўйибсиз-ку! Ўзингиз ўтириб олибсиз. Қопда тузни ҳам ортиб олибсиз! - дейишса, афанди шартта эшакдан тушиб, қопдаги тузни елкасига ортиб, эшакни устига ўтирибди-да:
— Ана, энди бўлдими?! - деб йўлида давом этган экан.

Бозорда бир киши сотувчига:
— 7-синфда ўқийдиган болага оёқ кийими борми? - дебди.
— Аниқроқ айтинг, топилади, - деб сўрабди сотувчи.
— Аниқроғини айтсам, 7 "В" синфида ўқийдиган болага.

Бешта оғайни чойхонада ўтирса, телефон жиринглабди:
— Алло, адаси, кеча мен сизга айтган тилла занжирни бугун қўшнимиз сотиб чиқди. Олаверайми?
— Ҳа, олавер!
— Кейин, интернет орқали янги телефонга ҳам буюртма бериб юбормоқчиман, майлими?
— Майли!
— Келаси ҳафта 8 март байрами экан. Шунга янги кўйлак ҳам тиктирмоқчиман. Уйдаги пулдан олиб, тикувчига бориб келсаммикин дегандим?!
— Хўп майли, боравер!
Телефон суҳбати тугагач, йигит телефонни жойига қўйиб дебди:
— Оғайнилар, манави телефон ўзи кимники эди???

Бир куни командир қозок, рус ва тожик аскарларни олиб овга борибди. Командир ҳар бир аскарга қуён овлаб келиш учун вақт берибди.
Қозоқ ва рус ўз вақтида қуён овлаб келибди. Лекин тожикдан дарак йўқ эмиш.
Бориб қарашса, тожик бир бўрини тутиб олиб:
— Командирга қуёнман деб айтасан, - деб ўргатиб турганмиш.

Янги йил куни ёш қиз хомуш ўтириб:
— Қорбободан совғага "Эртаклардагидек, шаҳзода мени қидириб келсин!" деб сўраган эдим. Пиёниста қўшним Тимур ака эшигимни тақиллатиб келишини назарда тутмагандим...

Бир эркак ишдан сўнг жазмани билан тушлик қилиб, кинога бориб уйга қайтибди. Уйда хотини шўрва пиширган экан. Овқатдан бироз ичган бўлибди-да, кириб ётибди. Энди ухламоқчи бўлаётган экан, телефонга Смс келиб қолибди. Телефонни олиб хожатхонага югурибди. Смсни очиб қараса, "Жоним бугунги тушлик ва сайр учун раҳмат! Унутилмас кун бўлди..." деган Смс келган экан. Хотини кўриб қолишидан қўрқиб, Смс ни ўчириб, секин кириб ётса, хотини:
— Тинчликми?, - дебди.
— Пиширган шўрванг ёқмади шекилли, кўнглим беҳузур бўляпти, - деб тўнғиллабди эри.
— Унда нега мени телефонимни кўтариб кириб кетдингиз? Ўзингизники мана-ку!? - деган экан хотини.