Дода латифалар

Таксида кетаётсам, ҳайдовчи мамнун оҳангда менга гап бошлади:
— Ўз касбимдан мамнунман. Ўзимга-ўзим хўжайин. Ҳеч ким менга буйруқ бермайди.
Шу вақт ҳайдовчини гапини бўлдим-да:
— Чорраҳадан ўнгга қайрилинг! - дедим.

Икки аскар бир-бирига мақтаняпти. Биринчиси деди:
— Хотинимнинг қўли гул! Шимимга ямоқ солса, ямоқ солгани умуман билинмайди-э!
Иккинчиси бўш кемади:
— Э бунинг нима бўпти!? Менинг хотинчамни қўлини гул десанг арзийди! Кийимларини ювса, ювгани умуман билинмайди!

Маст киши жон-жаҳди билан симёғочни тақиллатарди.
— Хотин, кимга айтяпман, оч эшикни!
Яқиндан ўтиб кетаётган посбон ёнига келиб:
— Ўртоқ, нима гап?! Қани, «пуф» денг-чи?!
Маст жон-жаҳди билан пуфлаганди, посбон ўзи чайқала бошлади ва симёғочни тақиллатиб бақирди:
— Қанака хотинсиз, ўзи? Очинг эшикни!

Ресторанда иккита ўзбек официантга буюртма беришяпти:
— Бизга чой-пой, нон-пон, овқат-повқат олиб келинг.
Нарироқда ўтирган рус аёл уларни гапини эшитиб:
— Нимага сизлар ҳар бир сўзга қўшимча қўшиб гапирасизлар? Чой, нон, овқат десангиз бўлмайдими? Агар гапларингизга қўшимча қўшмасдан гапирсангиз, бир тарелка тилла бераман, - дебди.
Шунда ўзбеклардан бири:
— Тарелка-парелкаси билан берасизми? - дермиш.

Бир куни жиннихона бошлиғи жинниларни синаш учун ҳаммасига бўш ликопча бериб:
— Овқатингларни еб олинглар, - дебди.
Ҳамма жиннилар липопчани тақиллатиб овқатланаётган ҳаракат қилаверишибди.
Фақат биттаси емасдан ўтирса, бошлиғи:
— Нега овқатингни емадинг? - деса, жинни:
— Булар жинни-да, иссиқ овқатни ейишяпти. Мен совиса ейман, - дермиш.

Ёш ўқитувчи синфга кириб келиб:
— Салом болажонлар, - деса, синфдаги болалар бир овоздан:
— Йўқол, чиқиб кет! - деб бақиришибди.
Қўрқиб кетган ёш ўқитувчи директор хонасига югуриб кириб, вазиятни тушунтирса, директор:
— Бу синф ўқувчиларига аввал "қармоқ" ташлаб илинтириб олиш керак. кейин дарс бошлайсиз. Юринг кўрсатаман, - деб синф эшигини тепиб кирибди-да:
— Орангизда ким глобусни копток қилиб ўйнай олади? - сўрабди.
Ўқувчилар:
— Глобус нима ўзи? - дейишибди.
— Глобус ҳақида янги ўқитувчингиз гапириб беради, - деган экан.

Бир йигит қизни орқасидан югуриб:
— Яхши қиз, сиз билан танишсам бўладими?
Қиз ортига ўгирилиб:
— Йўқ, - деса, йигит қўрқиб кетиб:
— Вой, худога шукур-ей, - дермиш.

Йигит севган қизига:
— Мен сени севаман!
— Бу гапингизни яна кимларга айтгансиз?
— Ҳаммага.
— Ҳаммага?!
— Сени севишимни ҳаммага айтганман-да!

Бир куни қуён ўрмонга янги Каптива миниб келибди. Бўри ва бошқа ҳайвонлар қизиқиб:
— Қайси пулга олдинг, - деб сўрашибди, шунда қуён:
— Бир неча йил пул тўплаб олдим, - дебди. Бўрига қараб:
— Сен ҳам ароқ ичавермай, пулингни тўпла, - деб кетибди.
Эртасига ўрмонда шовқин-суронмиш. Ҳайвонлар қараса бўри вертолётда учиб келибди.
Ҳамма ҳайвонлар вертолёт учун бунча пулни қаердан олдинг, - деб сўрашибди. Шунда бўри, — Ҳамма ароқ шишаларимни топшириб юбордим, - дебди.

Агар сизни хотинингиз жуда-ям уйқучи бўлса, тонгда будильник товушига ҳам уйғонмаса, буни йўли осон:
Бегона аёлни исмини айтиб уйғотинг!