Дода латифалар

Бир куни афанди ўзбек, рус ва қозоқга биттадан автомобиль олиб келишларини айтибди. Ўзбек велосипед, рус Малибу ҳайдаб келибди. Қозоқдан эса дарак йўқ эмиш. Шунда афанди:
— Энди ҳар ким олиб келган нарсасини кўтарсин, - дебди.
Ўзбек велосипедни дарров кўтарибди. Рус эса бир кулиб, бир йиғлармиш.
Афанди русдан нега кулиб, йиғлаётганини сўрабди.
Шунда рус афандига:
— Йиғлашимни сабаби, Малибуни кўтара олмаяпман. Кулишимни сабаби эса, анави ерда қозоқ танк ҳайдаб келяпти, - дермиш.

Афанди ёғ олиш учун коса кўтариб бозорга борибди. Ёғфурушдан бир тангалик ёғ сўрабди. Ёғфуруш бир тангалик ёғни косага қуйган экан, коса тўлиб, озгинаси ортиб қолибди.
— Қолганини нима қиламиз? - сўрабди ёғфуруш.
— Орқасига қуй, - деб афанди косани ағдарган экан, ичидаги ёғ тўкилиб кетибди. Афанди ҳам озгинагина ёғни кўтариб, уйига келибди. Ёғни кўрган хотини қичқирибди:
— Шу ёғни олдингиз холосми?
Афанди бўлса:
— Эй нодон, кўп қичқирма! Бу ёғида ҳам бор, - дебди-да, косани ағдарган экан, қолган ёғ ҳам тўкилиб кетибди.

Ҳозирги қизларнинг севгисидан, менинг телефоним батарейкаси кўпга етади.

Қўшни ўғлингизни тарбияси билан яхшилаб шуғуллансангиз бўлмайдими? Бемахалда тунги барларда, кафеларда дайдиб юраркан?!
— Сизга ким айтди?
— Ана қизим айтди, ҳар куни кўрар экан!!!

Тиқилинч автобусда, бир рус қиз силтаниб чолни тиззасига ўтириб қолиб...
— Ух ты, какой кошмар, - деса.
Чол:
— Қизим сенга теккан нарса кошмар эмас, носқовоқ, - дермиш.

Хотиним мендан хафа бўлса, гаплашмай қўяди. 2 кундан кейин ўзи биринчи бўлиб гапиришни бошлайди. Биласизми нимага? Чунки ўтган 2 кун мени тинч юрганимга чидай олмай гапирваради.

Бир киши уйини деворларига гулқоғоз (обой) ёпиштирмоқчи бўлибди. Пастки қаватдаги қўшнисини уйига тушиб сўрабди:
— Сиз яқинда ремонт қилган эдингиз. Қанча гулқоғоз сотиб олгансиз?
— Олти ўрам гулқоғоз сотиб олганман, - дебди қўшниси.
У киши ҳам бозордан олтита гулқоғоз сотиб олибди.
Таъмирлаш ишларини тугатиб бўлгач қараса, 2 та ўрам гулқоғоз ортиб қолибди.
Қўшнисини эшигини тақиллатибди.
— Қанақа одамсиз?! Ростини айтсангиз бўлмасмиди!? 2 та ўрам гулқоғоз ортиб қолди-ку, - деса, қўшниси:
— Менда ҳам 2 та ўрам ортиб қолди. Сиз мендан қанча гулқоғоз ишлатдингиз деб эмас, қанча сотиб олган эдингиз деб сўрадингиз-ку!

Эшкакчилар ўртасида мусобақа ўтказилди. Ҳар бир қайиқ 9 кишини кўтара олар эди. Япония эшкакчилари ғолиб бўлибди. Бизникилар эса энг охирги.
Натижа таҳлилига кўра японлар қайиғида 1 та бошлиқ ва 8 та эшкакчи бор экан.
Бизникилар гуруҳда эса 1 та умумий бошлиқ, 3 та ўринбосар, 4 та бўлим мудири ва 1 та эшкакчи бор эди. Бизникилар дарров мағлубият сабабини аниқлашди. Эшкакчи айбдор! У ишдан кетибди.