Дода латифалар

"Иккичи"ларнинг 2 та нарсаси бўлади: машинаси ва уйи.
"Уччи"ларнинг 3 та нарсаси бор: машинаси, уйи ва далаҳовлиси.
Аълочиларнинг 5 та нарсаси бўлади: кал боши, кўзойнаклари, энг кам ойлик иш ҳаққи, қон босими ва кўкрак нишони.

Бир болакай мактабга кетаётса, ёнига такси келиб тўхтабди-да:
— Ўтир олиб бориб қўяман, - дебди ҳайдовчи болага раҳми келиб. Болакай машинага чиқибди-ю, ҳайдовчига савол бера бошлабди:
— Отам ҳарбий, онам милицияда ишласа, мен ким бўламан?
— Яхши ҳарбий бўласан.
Болакай яна сўради
— Агар отам ўқитувчи, онам эса боғча тарбиячиси бўлса, мен ким бўламан?
Ҳайдовчи:
— Мураббий бўлсанг керак.
Шундай қилиб болакай савол бераверибди. Охири ҳайдовчи жаҳли чиқиб, болага ўгирилибди-да:
— Агар отанг бемаъни, ароқхўр, қиморбоз бўлса, онанг бетайин бузуқи бўлса, сен ким бўласан?
Шунда болакай:
— Таксичи бўламан, - деган экан.

— Собир, нега мактаб ремонтига пул олиб келмадинг?
— Мен мактабни ҳеч қаерини бузмадим-ку!?

Эр-хотин гаплашиб ўтиришса, телефон жиринглаб қолибди.
Эр:
— Агар мени сўрашса, уйда йўқлар деб айтгин, - дебди.
Хотин бориб телефон гўшагини кўтариб:
— Алло, йўқ, эрим уйдалар, дебди.
Эри жаҳли чиқиб:
— Аҳмоқ, мени уйда йўқ, деб айтгин дедим-ку сенга, - деса, хотин бамайлихотир дермиш:
— Нега жаҳл қиласиз? Ахир телефон сизга бўлмадику, - дермиш.

— Зерикдингизми? Сирларингизни кимга айтишни билмаяпсизми? Барча сирларни очиб, ўзингизни енгил ҳис қилинг! 102 қисқа рақамига қўнғироқ қилиб, барчасини рўй-рост гапириб беринг!

Бир йигит сеҳрли чироқни топиб олибди-да, уни ишқалабди. Шу пайт ичидан жин чиқиб:
— Тила тилагингни..., - дебди.
Йигит ҳам шошилиб қолиб:
— Тинч океани устидан ўтадиган кўприк қуриб бер!, - деб юборибди.
— Эсинг жойидами?! У океан бўлса... Ўзингга фойдалироқ нарсани сўрасанг-чи, - деса, йигит:
— Дунёдаги барча аёлларни жаврамайдиган қилиб қўй!, - дебди.
Жин ҳам ўйланиб туриб:
— Қаерга кўприк қуриш керак эди...?, - дермиш.

— Мен фермерман. Етти мингта қўй боқаман. У ҳам етмагандек, ўғлим Тошкентда ўқийди. Уни домласини-ям қўшиб боқаман.

Катта бир корхонанинг раҳбари ишчилар интизомини тартибга солиб қўймоқчи бўлибди. Ишёқмас, дангаса бирор ходимни ишдан бўшатиб, қолганларга намуна кўрсатиб қўйиш ниятида текширувга чиқибди. Қараса, бир ёш ишчиси корхона ҳовлисида деворга суяниб, дам олиб турган экан. Раҳбарнинг фиғони фалакка чиқибди. Ёш йигитнинг ёнига келиб:
— Сенга бир ҳафтада нечи пул тўлашади?, - деб сўрабди жаҳл билан.
— Олти юз минг, - жавоб берибди ҳайрон бўлиб.
Раҳбар бошқаларга ҳам ўрнак бўлсан деган мақсадда, хонасидан икки ярим миллион олиб чиқибди-да ёш ишчисини қўлига тутқазиб дебди:
— Мана, тўрт ҳафталик маошингни ортиғи билан олгин-да, бу ердан йўқол, қайтиб кела кўрма!
Йигит пулни олиб, индамасдан кетибди. Раҳбар эса бу ҳолатни кузатиб турган ишчиларга қарата:
— Ким эди у ишёқмас?, - деб сўраса,
Ишчилардан бири:
— Пицца ташиш хизматидан эди. Олиб келган пиццасини пулини кутиб турганди, - деган экан.

Бир йигит уйланибди. Чимилдиққа киргандан сўнг, хотинига қараб:
— Бу уй энди сеники ҳам, ҳамма нарсага тегинишинг ва ишлатишинг мумкин. Фақат битта анави сандиққа тегмайсан. Тегинсанг кечирмайман сени, - дебди.
Хотини хўп деб 20 йил тегинмабди. Охири сабри чидамай сандиқчани очибди.
Қараса 500000 минг сўм пул билан уч дона тухум бор экан. Эри келгандан кейин сўрабди.
— Ҳа, майли очибсанда охири. Гап шундаки қачон сенга ҳиёнат қилсам сандиқчага битта тухум қўяр эдим, - деса
Хотини:
— Ҳа, 20 йил ичида учта ҳиёнатни кечириш мумкин. 500000 минг сўм пул қандай келди? - деса..
Эр:
— Биласанми асалим тухумлар кўпайиб кетгандан сўнг сотишга тўғри келди, - дермиш

Қиз билан йигит биринчи бор учрашгани чиқишибди. Йигит қизни музқаймоқ билан меҳмон қилибди. Иккаласи индамай музқаймоқ еяётган экан, қиз йигитдан сўрабди:
— Нега гапирмай индамай ўтирибсиз, нималар ҳақида ўйлаяпсиз?
— Ўша сиз ўйлаётган нарсалар ҳақида ўйлаяпман.
— Вой, уятсиз, уялмайсизми тўйимиз бўлмай туриб, шунақа нарсалар ҳақида ўйлагани?