Bolalar haqida latifalar

O‘qituvchi bolalarni hayvonot bog‘iga olib boribdi.
Bolalar:
— Bu maymunmi?
O‘qituvchi:
— Yo‘q, bu kassir!
Bir bolakayning adasi katta amaldor ekan. Bolakay maktabdan 2 baho olib kelibdi. Shunda oyisi bolasiga debdi:
— Kundaligingni ichiga manavi pullarni solib, adangga uzatsang, seni urishmaydilar!
Bir kuni ota-o‘g‘il baliq oviga borishibdi. Qarmoqqa katta baliq ilinibdi.
O‘g‘li:
— Dada, buni qanday o‘ldiramiz, - debdi.
Shunda otasi:
— Shuniyam o‘ylab turibsanmi? Suvga cho‘ktir, o‘zi o‘ladi, - debdi.
Otasi bilan hindular haqidagi filmni ko‘rib yotgan bolakay debdi:
— Adajon, nega bu odamlar yuzlarini bo‘yab olishgan?
— Ular jang qilishmoqchi, - debdi otasi.
Kechqurun oshxonadan yugurib chiqqan o‘g‘li adasiga:
— Adajon, oyim jang qilmoqchilar... – dermish.
Bola onasidan so‘rapti:
— Oyijon, meni sizga kim bergan?
Onasi:
— Seni laylak tashlab ketgan! – debdi.
Birdan eshik qo‘ng‘irog‘i chalinibdi. Bola borib teshikdan qarab oyisiga:
— Oyi laylak ishdan keldi. Bozor qilib kelibdilar, - dermish.
— Bolajonlar, kim o‘zini ahmoq, landovur, dangasa deb o‘ylasa o‘rnidan tursin! – debdi. Sinfda ancha vaqt jimlikdan so‘ng bir bola o‘rnidan turganmish.
O‘qituvchi:
— Ho‘sh, sen o‘zingni ahmoq, landovur, dangasa dyeb o‘ylaysanmi? – desa, bola:
— Yo‘q ustoz! Bir o‘zingiz turganingizga hijolat bo‘ldim. Sizga dalda berish uchun turdim! – dermish.
Maktabda oraliq imtihon topshiriladigan kun. Dars boshlanibdi. O‘qituvchi:
— Hozir imtihon topshirasizlar.
— Ustoz, kalkulyatordan foydalansak bo‘ladimi?
— Bo‘ladi.
— Mendeleyev jadvalidan-chi?
— Bemalol. Yozinglar, mavzu “Ikkinchi jahon urushi”.
5 yoshli bolakay ko‘chaga o‘ynagani chiqib ketayotib, 87 ga kirgan buvasiga debdi:
— Buvajon, tishlaringiz bormi?
Buvasi:
— Voy, menda tish qolibdimi?! – debdi.
Bolakay xursand bo‘lib:
— Unda mana bu kulchamni ushlab turing. Men ko‘chada biroz o‘ynab kelaman, - degan ekan.
Bolalar bogʻchasi:
— Bogʻcha opa, oʻrtogʻimga ayting, “Viz-z-z” etib u yoqdan bu yoqqa yuguravermasin... – debdi bolakay.
Bogʻcha opasi:
— Axir u mashina-mashina oʻynayapti-ku! Nima, senga uni “Viz-z-z” degani yoqmayaptimi? – desa, bolakay:
— Yoʻq, gazi yoqmayapti, - dermish.
— Davlat iqtisodiyoti tanazzulga yuz tutgan. Mamlakat aholisi och, nochor va norozi, ammo jim! Xalq umuman kitob o‘qimay qo‘ygan... Yosh bolalar ham ko‘chalarda sigaret chekib yurishar, qo‘ni-qo‘shnilar bir-birlari bilan bir qarich yerni talashib, hukumatga arz qilishardi. Rahbarlar esa go‘yoki hech narsani ko‘rmayotgandek, bemalol yuraverishar, oddiy xalqning pullariga dang‘illama...
— O‘g‘lim, yangiliklarni o‘qishni bas qil! Kompyuterni o‘chirgin-da, dars qilishni boshla!
— Oyijon, axir men tarix fanidan “Rim imperiyasini qulashi” mavzusini o‘qiyapman-ku!