Shifokorlar haqida latifalar

Yosh hamshira vrach xonasiga kirib:
— Chaqirdingizmi? - debdi.
— Ha. 5-palatadagi bemordan qon oldingizmi? - so‘rabdi vrach.
— Oldim. Atigi 3 litr chiqdi, - dermish.
Xotin:
— Dadasi, doktorga borgandim. U menga Antaliyagami, Malayziyagami yoki Dubaygami borib, suv bo‘yida dam olishimni buyurdi. Qayerga boramiz?
Er:
— Boshqa doktorga!
Stomatolog vrach vafot etibdi. Hamkasb do‘stlari uning qabri ustiga katta tish haykalini qo‘yishibdi. Vrachlardan biri kular emish.
— Nega kulyapsan? – deyishsa, vrach:
— Men o‘lsam, qabrim ustiga nima qo‘yishar ekan? - dermish.
Narkozdan chiqqan bemor ko‘zini sekin ochar ekan, yuziga har xil bo‘yoqlarni surtib olgan hamshirani ko‘rib:
— Yo Olloh! Qaysi gunohim uchun meni do‘zaxga jo‘natding, - dermish.
Yuz yoshga to‘lgan kampir o‘zini davolovchi vrachiga dedi:
— Eh, Sultonboy, sizga shu qadar o‘rganib qolgandim… Mabodo… O‘lib-netib qolsangiz,
meni kim davolarkan-a?..
Xirurgiya bo‘limida operatsiya ketyapti. Shu payt chiroq o‘chib qolibdi. Birozdan so‘ng chiroq yonganida qarashsa bemor yo‘q emish. Asisentlar g‘ala-g‘ovur ko‘tara boshlabdi. Xirurg esa xotirjam holda:
— Bo‘ldi tinchlaninglar. Birinchidan, bemor narkozda uzoqqa borolmaydi, ikkinchidan, jigari meni qo‘limda qoldi, - dermish.
Bemorni ko‘zdan kechirgan vrach uning xotinini bir chetga imlab chaqiribdi-da debdi:
— Negadir eringiz menga yoqmayapti...
Xotini unga:
— Menga ham yoqmaydi. Lekin nima qilay, juda ro‘zg‘orbop er-da!? – dermish.
Bir kishi tanish vrachdan so‘ragan ekan:
— Nima uchun bemorlaringdan nonushtaga nima yeganini so‘raysan?
Vrach:
— Shunga qarab bemorimning hamyoni baquvvatmi-yo‘qmi shuni bilib olaman-da!
Bir odamni mashina urib ketibdi. Vrach uni ko‘rib “Tamom” debdi.
Haligi odam boshini ko‘tarib “Men tirikman!” deb qichqirsa, xotini yoniga kelib “Tinchlaning azizim! Vrach biladimi yo siz bilasizmi!?” degan ekan.
Ruhiy kasallar shifoxonasiga borgan psixolog hammani yig‘ib, doskaga mashinani rasmini chizibdi-da, debdi:
— Kim shu mashinaga birinchi bo‘lib o‘tirib olsa, uyga ketaveradi.
Hamma jinnilar doskaga qarab yuguribdi. Faqat bittasi joyidan turmabdi.
— Sen nega turmading? - deb so‘rashsa, boyagi jinni:
— Kalit menda-ku, - degan ekan.